YALIYOJILI katika Baraza maalum la kujadili Hoja za Mkaguzi na Mdhibiti Mkuu wa Hesabu za Serikali Kuishia Juni 2022

Tarehe ya Kuwekwa: June 21st, 2023

MKUU wa Mkoa wa Ruvuma Mhe. Kanali Laban Thomasi ameipongeza Halmashauri ya Wilaya ya Songea kwa kupata Hati Safi katika ripoti ya Mdhibiti na Mkaguzi Mkuu wa Hesabu za Serikali kwa mwaka wa fedha 2021/2022.

Mkuu wa Mkoa ametoa pongezi hizo Juni 21, 2023 katika ukumbi wa mikutano wa Halmashauri wakati wa kikao maalum cha Baraza la Madiwani cha kujadili taarifa ya Mdhibiti na Mkaguzi Mkuu wa Hesabu za Serikali (CAG) kwa mwaka wa fedha unaoishia Juni 30, 2022.

Pamoja na pongezi hizo Mhe. Kanali Thomasi ameiagiza Halmashauri ya Wilaya ya Songea ishirikiane kusimamia kikamilifu ukusanyaji wa mapato ya ndani, usimamizi wa miradi ya maendeleo, kuzuia hoja za ukaguzi Pamoja na kubuni vyanzo vipya vya mapato.

Vilevile Mhe. Kanali Thomasi amewataka Watumishi kufuata utaratibu, kanuni na sheria za utumishi wa umma na kuwasilisha mapema nyaraka za matumizi yote ya fedha zinazohitajika wakati wa ukaguzi ili kuepuka Hoja.

‘‘Kila Mtumishi atimize wajibu wake kwa kutenda haki kwa watu mnaowahudumia vilevile imarisheni mahusiano mazuri ndani ya Halmashauri hii itawasaidia kufanya kazi kwa ushirikiano na baadae kuleta matokeo Chanya katika Halmashauri’’, amesisitiza Mhe. Kanali Thomas.

Mhe. Kanali Thomasi ametoa rai kwa Wataalam kutoa elimu kwa vikundi vilivyopewa mikopo ya asilimia 10 kwa Wanawake, Vijana na Watu wenye ulemavu ili kuhakikisha mikopo hiyo wanaitumia vizuri na kufanya marejesho ndani ya muda uliopangwa.

Akizungumza Mkuu wa Wilaya ya Songea Mhe. Kapenjama Ndile amemshukuru Mkuu wa Mkoa kwa maelekezo pia amemuhakikishia kuwa atashirikiana na Viongozi na Wataalamu kusimamia vizuri suala la ukusanyaji wa mapato ya ndani ya Halmashauri hasa katika ushuru wa mazao na makaa ya mawe.

Nae Mwenyekiti wa Halmashauri ya Wilaya ya Songea akizungumza kwa niaba ya Uongozi wa Halmashauri amemshukuru Mkuu wa Mkoa kwa maelekezo yote aliyoyatoa na ameahidi kuyafanyia kazi ili kuhakikisha Halmashauri Inaendelea kupata Hati Safi.