RUWASA kutumia Milioni 848 kumaliza kero ya maji Kijiji cha Parangu

Tarehe ya Kuwekwa: April 3rd, 2022

MKUU wa Wilaya ya Songea mkoani Ruvuma Pololet Mgema amesema Serikali ya awamu ya sita chini ya Uongozi wa Mama Samia Suluhu Hassan Rais wa Jamhuri ya Muungano wa Tanzania imetoa kiasi cha shilingi milioni 848 kujenga mradi wa maji katika Kijiji cha Parangu kilichopo Kata ya Parangu,

Mgema  ameyasema hayo wakati akikabidhi miundo mbinu ya ujenzi wa miradi ya maji katika kijiji hicho kwenye hafla fupi iliyofanyika hivi karibuni katika Shule ya Sekondari ya Jenista Mhagama iliyojengwa katika kijiji hicho.

“Napenda nitumie fursa hii kumpongeza Rais wetu Mhe.Samia Suluhu  Hassani kwakutupa fedha nyingi katika Wilaya yetu ya Songea katika sekta zote za ujenzi wa miradi,”amesema Mgema.

Kwaupande wake Mwenyekiti wa Halmashauri ya Wilaya ya Songea Menas Komba amemshukuru  Mbunge wa Jimbo hilo Mhe Jenista Mhagama kwa ufuatiliaji wa fedha kutoka Serikali kuu ambazo zinatekeleza miradi mbalimbali ya maendeleo kwa kushirikiana na  viongozi na wadau wengine wa maendeleo 

  .

Mhe.Komba  amesema kuwa Serikali imekuwa ikifanya kazi kubwa katika kuwaletea wananchi maendeleo kusudiwa kulingana na ilani ya Ccm ya mwaka 2020-2025 na kwamba kazi kubwa hivyo  wao kama viongozi jukumu lao ni kusimamia fedha zinazotolewa na Serikali zinatekeleza ujenzi wa shughuli za miradi kama ilivyokusudiwa.

Naye Mwenyekiti wa Kijiji hicho Bernadetha Mapunda ameishukuru Serikali kupitia Wakala wa Maji na Usafi wa Mazingira Mijini na Vijijini(RUWASA ) Songea kwa kuwajengea mradi huo wa maji ambao utawasaidia kuokoa muda wa kufuata maji umbali mrefu kwenye visima vya asili, pia utawaondolea maradhi yatokanayo na maji yasiyosafi na salama

Mapunda amesema kupitia mkutano wa hadhara walioketi wameadhimia kumtia hatiani mtu yoyote atakayebainika anaharibu vyanzo vya maji na atakayekaidi kuchangia gharama za huduma za maji ambazo ni shilingi 2000/= kiwango ambacho wamekubaliana

Aidha Meneja wa Ruwasa wilaya ya Songea Mhandisi Mathias  Charles amesema mradi huo wa kijiji cha Parangu utajengwa umbali wa kilometa 19.55 ambapo kukamilika kwake utahudumia wananchi wapatao zaidi ya 3,000 na kwamba mradi huo umeanza kujengwa na utakamilika ifikapo mwezi juni 2022

Mhandisi Charles amewasisitiza wananchi kuendelea kutoa ushirikiano wa kupanda miti kwenye vyanzo vya maji, kuacha kufanya shughuli za kibinadamu kwenye maeneo ya vyanzo vya maji kwani shughuli hizo zinaathiri vyanzo hivyo

Ameitaja miradi mingine ambayo inatekelezwa na Ruwasa katika Halmashauri ya Wilaya ya Songea kuwa ni mradi wa maji Mtiririko wa Matimira na Mpitimbi B kwa jumla ya gharama ya bilioni 1.6

Imeandikwa na

Jacquelen Clavery

Afisa Habari

Songea dc