KAYA masikini waanza kulipwa "kidigitali",walengwa walalamikia utaratibu huo

Tarehe ya Kuwekwa: January 14th, 2022

Mfuko wa kuhudumia kaya maskini nchini  katika Halmashauri ya wilaya ya songea Mkoani Ruvuma umeanza utaratibu wa kuwalipa fedha walengwa wa kaya maskini kwa njia ya kidigitali huku baadhi ya  walengwa wa mfuko huo wakilalamikia changangamoto ya ukosefu wa mawasiliano ya mtandao wa simu na baadhi yao kutojua kabisa matumizi ya simu.

Mratibu wa TASAF wa Halmashauri hiyo Hossana Ngunge amesema utaratibu huo umeanza kutumika mwezi Julai 2021 na kuendelea  hivyo walengwa wote wanatakiwa kujisajili kwenye mitandao ya  simu ambayo wataitumia kupokelea fedha zao.

Ngunge ametoa ushauri kwa makampuni ya simu kutumia fursa ya kwenda katika maeneo ambayo bado hayana mawasiliano ya simu na yenye mawasiliano yasiyokuwa na uhakika kuyafikia maeneo hayo ili walengwa wa kaya maskini  na wananchi wengine waweze kunufaika na huduma hizo.

Ameongeza kwakusema utaratibu wa kuwalipa kaya maskini kwa njia ya simu kutasaidia kuondoa changamoto ya gharama za zoezi la kuwafikishia walengwa fedha zao na baadhi ya walengwa kudhulumiwa na watu wasio waaminifu ambao waliokuwa wakiwatuma kuwachukulia faedha hizo.

Kwa upande wao baadhi ya walengwa wa kaya maskini wameulalamikia  utaratibu wa kupokea fedha kwa njia ya simu kwao umekuwa na changamoto mbalimbali ikiwa ni pamoja na wao kutokuwa  na uelewa  juu ya matumizi sahihi ya simu hivyo kupelekea fedha zao kuporwa na wategemezi wao bila wao kutambua na kuomba wapatiwe fedha zao kwa njia ya tasilimu.

Halmashauri ya Wilaya ya Songea ina jumla ya kaya masikini 6,143 kati ya kaya hizo  3,731 ziliingizwa kwenye mpango tangu awamu ya kwanza kutoka Vijijiji 32  na awamu ya pili kaya 2,412 zimeingizwa kwenye mpango wa kupima matokeao ya kunusuru kaya masikini kwenye vijiji 24 na wataanza kulipwa baada ya kufanyiwa tathimini.

Imeandaliwa na kuandikwa na

Jacquelen Clavery

Afisa Habari

Songea DC.