WAZIRI Mpina atangaza kituo cha Luhira kuwa cha mfano

Tarehe ya Kuwekwa: January 7th, 2020

Waziri wa Mifugo na Uvuvi Luhaga  Mpina amewaagiza   viongozi wa Mkoa wa Ruvuma  kufanya utaratibu wa kujenga hosteli na kiwanda cha kutengeneza chakula cha samaki katika  kituo cha kuzalishia samaki Luhira kilichopo Manispaa ya Songea.

Amesema hosteli hiyo itasaidia kutoa mafunzo ya muda mfupi na kuwatunuku vyeti wahitimu mara baada ya kumaliza mafunzo na kiwanda kitasaidia kuzalisha chakula cha samaki hivyo uzalishaji wa samaki utaongezeka.

Waziri Mpina ameyasema hayo alipofanya  ziara  ya kikazi  katika Mkoa wa Ruvuma ,mara baada ya kutembelea kituo hicho ambacho pia kinahusuka na masuala ya utalii.

Mpina amepongeza kazi nzuri inayofanywa na kituo hicho na kuagiza mafanikio yanayopatikana yaweze kutoa fursa mbalimbali ikiwemo mafunzo na kupata elimu ambayo itawasaidia kuboresha kipato na kuinua uchumi.

“Nimefurahishwa na kituo hiki ambacho ni cha mfano Tanzania,naagiza mjitangaza kwa wananchi ili watu waweze kujipangia ratiba ya kuja kujifunza  hapa bila kuathiri shughuli zao za kijamii’’,amesisitiza.

Naye Mkuu wa Wilaya ya Songea pololet Mgema amesema kituo cha kuzalishia vifaranga vya samaki Luhira kimekuwa kituo cha kiutalii  na kwamba likiboreshwa  ni chanzo cha mapato.

Luka Mgwena ni Afisa Mfawidhi  wa Kituo cha samaki Luhira amesema kituo hicho kina uwezo wa kuzalisha vifaranga  40,000 kwa wiki na kina uwezo wa kusambaza ndani ya Mkoa na nje ya Mkoa ambapo tayari kituo kimesambaza  vifaranga,Halmashauri ya Wilaya ya Mbarali katika Mkoa wa Mbeya,Mkoa wa Songwe na Njombe.